Sunday, September 28, 2014

වීය බඹදත් An Illustrious King Called Bambadath


වර්ථමාන ‍ලෝකය කලා නිර්මාණකරනයේදී අකුරු වලට වඩා රූපවලට ප්‍රමුඛතාවය ලැබෙන කාලය පැමිණ තිබේ. ඒ නිසා පුරාතනයේ සිට පැවත එන පුරාවෘත ආදිය රසවත් ටෙලිනාට්‍ය සහ සිනමා කෘති ලෙස ඉදිරිපත් වීමේ ප්‍රවනතාවයක් ඇතිවෙමින් පවතී. ගේම් ඔෆ්ද ත්‍රෝන් නැරඹූ මගේ මිතුරකු එහි ආතර් මැරෙන විට විස්සෝප වෙමින් ඒ ගැන දුක් වූයේ තමුන්ගේ සෙනෙහබර ආත්ත,මුත්තා මැරුණා ලෙස වූ ශෝක‍යකිනි. නමුත් ලංකාවේ දැන් දැන් පහල වෙන ඉතිහාස කතා බලා පටන් ගත් තැන පටන් අවසානය දක්වා පේන අඩුපාඩු වලට සිනාසිය හැකි කෘති විනා වටිනාකමක් ඇති ඒවා බිහිවෙන ආකාරයක් පේන්නෙ නැත.
කුවේණියට රඟපෑ නාකි පෙනුමක් ඇති ගෑනිය ඇහැළේපොල කුමාරිහාමි ලෙස තෝරාගෙන චිත්‍රපටියක් පහුගිය දිනවල තිරගත විය. ශ්‍රී වික්‍රම රාජසිංහ රජු පවා කෙළ හලමින් සිටි එවකට කන්‍ද උඩරට ලක්ෂණ රූපයෙන් යුතු කුල කාන්තාවගේ මනෝ චිත්‍රය පවා ඒ නාකි පෙනුමැති නිළිය විසින් අපට අහිමි කරන ලදී. බාගෙදා ශ්‍රී වික්‍රම රාජසිංහට රඟපෑ ජැකාගේ සිත හෝ වෙනත් යමක් ඇද උරාගත් එකියක් වූ නිසා එසේ ඒ චරිතය ඇයට ලැබුනාදැයි දන්නේ නැත.
ලාංකික පුරාවෘත බොහොමයක් ආගම සහ ඇදහීම් හා සෘජු ලෙසම සම්බන්ධය.රූප පෙට්ටියේ පෙන්වන දුම් දමන අලංකාර කරන ලද කෑම ආදිය තලුමරමින් කන අයුරු පෙන්වන විට එහි සුවඳ පොදක්වත් රසින් බිඳක්වත් අපට නෙදැනුනත් අපේ කටට කෙළ උනයි. . එසේම යම් වැදගත් ධර්ම කාරණාවෝ වුවද කතාන්දරයකට හෝ වෙනත් උපමා රූපක ආදිය යොදා පැහැදිලි කරන විට අපිට අමුවෙන්ම ධර්මය දෙසනවාට වඩා ධර්ම කොටස් ගැන ආසාවක් උපදී.
බෞද්ධ ධර්ම කොටස් පැහැදිලි කරනු වස් ඇති වූ සාහිත්‍ය කෘති පසුකාලීනව වෙනස්ම මගක් ගොස් හින්දු දේව සංකල්ප හා මුසුවීමේ අවස්ථාවකට එළැඹේ, කතරගම, ඝන, විශ්නු ආදි දේව වන්දනාවන්ද, මහා බ්‍රහ්මයා, සුරා සුර ලෝක, යම ලෝකය ආදී සංකල්පද එසේ යම්යම් මිශ්‍ර වීම් මගින් ඇතිවන්නට ඇත.
ලෝකයේ දැනට ජනප්‍රිය බොහෝ ආගම් පුද්ගලයා මූලික කොට ගෙන විමුක්තිය උදාකරන ඒවා වෙයි. ඒ ඒ පුද්ගලයාට දෙවියන්ට සමීප වීමට හෝ මෝක්ෂය ලබාගන්නට ලේසි පාරක් ආගම් මගින් පහදා දෙයි. ඒ ආගම් වලට නැඹුරු වන සමාජයන් වඩාත් දියුනු වේ යැයි අපිට බැලූබැල්මට සිතෙන නමුදු වර්ථමාන ලෝකය දෙස නෙත් යොමා බැලුවොත් ආගම කෙරෙහි වඩාත් ඇළුන ජාතින් අතර නිරන්තර කෝලහාල ඇති බවක් ඔබට පෙනී යනවා ඇත.
බෞද්ධ සාහිත්‍ය දෙස බැලුවොත් සද්ධර්මාලංකාරය, සද්ධර්ම රත්නාවලිය,ජාතක පොත ආදී කෘතිවල ඒ ඒ පුද්ගලයින් හා සම්බන්ධ කතාන්දර ආදිය ඇතිමුත් සාමූහික දේශපාලනය හා සම්බන්ධ අවස්ථාවන් ඉතාම විරලය. රජවරුන් සිටුවරුන් බලාධිකාරින් විසින් කරනු ලබන පිංකම් සැහැසිකම් ආදිය ගැන විස්තර ඇතිමුත් ඒ බලාධිකාරින්ට විරුද්ධ වෙන හෝ රජතුමාට එරෙහිව මත පළකරන කතා ආදිය ඇත්තේ ඉතාම කළාතුරකිනි. මිනිසුන් සිය ගනනක් මරා දැමීමෙන් ජීවිකාව කරගත් වධකයෙකු පවා අවසන තෙර නමකට දානයක් දීමෙන් බොහෝ කලක් දිව්‍ය සම්පත් ලැබූ කතාවක්ද ඒ පොත් හි ඇත. කවර වූ අයහපත් ක්‍රමයකට මුදල් ඉපයූයේ වුවද අවසන මහා දන්වැට පවත්වා, සති ගානක් දන් පින් කරන ලද්දේ වී නම් ඒ පුද්ගලයා බොහෝවිට දිවියලෝක සම්පත්තිය ලබන බවක් මේ පොත් හී බොහෝ කතාවන් වල අන්තර්ගතය.
බුදු දහම ව්‍යාප්ත කර සාමාන්‍ය ජනයාට ආගම දහම ඉගැන්වීම,ශ්‍රද්ධාව නැංවීම මෙන්ම සියලු පුද්ගලයින් පුද්ගලිකව පින් දහම් කොරගනිමින් පුද්ගලික අභිමතාර්ථයන් ඔස‍්සේ පුද්ගල මනස දැක්කීමක් මේ පුරාණ බෞද්ධ කෘති හරහා සිද්ධ වේ යැයි මට සිතේ. අද ලංකාවේ පලවන රජයට පක්ෂපාතී පුවත්පත්හී රජය අතින් සිදුවන වරදක් ඉඳහිට පළ වුවද ඒ වරද ඉබේ සිද්ධ වූ ආකාරයක්‍ පෙන්නුම් කරන මුත් එයට හේතු භූත වූ දේශපාලනය වත් ඒ පිටුපස සිටින පුද්ගලයින් වත් හෙළිවන්නේ නැත. එසේම එකලද පොත් පත් ලිවීමට හැකියාව තිබූ අයට රාජ්‍යය බලය අභියෝගයට ලක් නොවන ආකාරයට ලිවීමේ යම් කිසි ස්වයං විනය සම්ප්‍රදායක් තිබෙන්නට ඇත.
අප සමාජයට ගැලපෙන දේශපාලන ක්‍රම ආදියගැන විවිධ කතිකාවත් විවිධ කාලයන්හි ඇති වේ. අයෙක් බටහිර ඉතා සාර්ථක ක්‍රම අමු අමුවේ මෙහෙට හරියතැයි සිතා සිටිති. නමුත් අප දකුනු ආසියානු මනස වැඩකරන්නේ බටහිර යුරෝපයේ මිනිසුන්ගේ මනස වැඩකරන ආකාරයට නොවේ. ඒ රටවල ඇති දේවල් එලෙසම කොපි‍කොට මෙහි දැමූ කල ඒවා අසාර්ථක වන බවට උදාහරණ කොතෙකුත් අප සමාජයෙන්ම සොයාගත හැක.
සුගතපාල ද සිල්වා මහතාගේ පවර නි‍රි‍ඳෙක් වී ද බඹදත් යනු මේ අප රට පුරාණ සාහිත්‍ය කෘති හරහා උකහා ගත් තොරතුරු වලින් ලෝකයේ මැවුම් වාදය ගැන නැවුම් කතාවක් ඉදිරිපත් කරන පොතකි. ඒ කතාව ලෝකයේ මුල්ම මනුෂ්‍යවාස ඇතිවීම පිලිබද හින්දු හා බෞද්ධ මතාවද වලට සමීප වුවත් එය ලක්ෂණ කතාවක් ලෙස මනාකොට ඉදිරිපත් කරන්නට සුගතපාල ද සිල්වා මහතා සමත් වී තිබේ. එවැනි වූ බෞද්ධ හා හින්දු මනස් හී පවතින මනෝරාජික ‍ලෝක මැවුම් වාදය සියුම් ලෙස උපහාසයට ලක් කරන්නට ද සුගතපාල මහතා කටයුතු කර ඇත.
මේ කතා පොත ගැන වූ විචාර ආදිය මට වැඩිපුර හමු වූ‍යේ නැත. ලාංකික විචාරකයින් බොහොමයක් බාස්කට් තනා ඒ තුලට කතා රචකයා එබී‍මේ දක්ෂයෝ වෙති. ඔවුන්ට ළඟ බොළඳ නවකතා කාරයෝය. වාමාංසික සමාජවාදී හොරුය, පස්චාත් නූතනවාදියෝය, ඉතිහාසය විකෘත කරන්නෝය,. අම්මා වුව විකුනාගත හැකි තරම් වෙලෙන්දෝය. පිටරට ආබාසය ලබා පොත් කොපි කරන්නෝය. ක්ෂානර, ධාරාවන්, නිමිති ආදියෙන් විශේස වන්නෝය වශයෙන් බාස්කට් තිබේ. යම් නවකතාවක් පල වූ කල ඔවුන් කරන්නේ මේ බාස්කට් දෙක තුනකට අර කෘතිය ඔබා ඉන් පසු පොතත් කතුවරයාත් තැලීම හෝ උඩදැමීමයි. සුගතපාලද සිල්වා වැනි කෙනෙකුගේ මෙවන් කෘතියක් දමන බාස්කට් ඔවුන්ට ලේසියෙන් තෝරාගත නොහැකි නිසාම මේ ගැන වැඩිපුර පෙරලිකාර විචාර කතා ආදිය උපදින්නේ නැතිව ඇතැයි මට සිතේ.
අද කාලයේ ජනප්‍රිය කතාවක් වන්නට නම් එයට ලිංගික ජවනිකාද ඇතුලත් විය යුතුව ඇත. මේ කතාවේද බුරියේ උපත, පර අඹුවන් සොයා යෑමේ පුරුද්දේ උපත, නපුංසක පරපුරේ ආරම්භය,ස්ත්‍රීන්‍ ගේද පුරුෂයින්ගේද රහස් අවශ්‍යතාවන්හී මූලය , ආදී වූ සෘංගාරාත්මක දේ ගැන කාව්‍යමය බසකින් නවතම ආකාරයට පහදා ඇත. යම් යම් වදන් හි ගැඹුර නිසා නොතේරී ගියොත් හැර ‍සමහර ලිංගික ජවනිකා විස්තර කරන විට ඒ හා සම්බන්ධ කදිම මනෝ චිත්‍ර ඇතිකරන්නට ද මේ පොත සමත්ය.
යම් පුද්ගලයෙකු මා කියවූ හොඳම නවකතාව කිමෙක්දැයි ඇසුවෝතින් මා දැනට කියවා ඇති පොත් පත් ස්වල්පයෙන් මා තෝරන්නේ මේ පොතය. කතාන්දර රසය විඳින අයට එයත්, ප්‍රේම කතා බොළද කතා රුචි අයට ආදරනීය ප්‍රේම කතාවකුත්, ‍ඓතිහාසික කතා වලට ආසා අයට පුරාණ ශ්‍රී විභූතිය ගැන වූ විස්තර ආදියත්, දේශපාලනික අදහස් දරන අයට ඒ දේශපාලනයේ පවතින සදාතනික කුණු රසයත්, ශෘංගාරාත්මක දේට කැමති අයට ශෘංගාරාත්මක ජවනිකාත්, ඒ මෙලෝ දෙයක් නොදන්නා කෙනෙකුට අලුත්ම වර්ගයේ පොතකුත් පවර නිරි‍ඳෙකු වීය බඹදත් කෘතිය හරහා සුගතපාල ද සිල්වා මහතා අපට ලබා දෙයි.
පොතේ නම : පවර නිරි‍ඳෙක් වීය බඹදත්
කතුවරයා : සුගතපාල ද සිල්වා
ප්‍රකාශනය : ඇස් ගොඩගේ සහ ස‍හෝදරයෝ (ප්‍රථම මුද්‍රනය 1997)
පොතේ අංකය : ISBN-955-20-2403X

6 comments:

  1. ඉන්දික අර ලොරියට කරගහන්න යන කථාව ඇත්තද..... ට්‍රයල් එකකුත් ලැබුනා කියන්නෙ...

    ReplyDelete
  2. කියවන්න වටින පොතක්..

    ReplyDelete
  3. අපේ ඉස්කෝලෙ පුස්තකාලෙ තිවුන ලිංගිකත්වය ගැන කතා කරන එකම නවකතාව ඕක විතරයි. නමය වසරෙදි කියෙවුවෙ. මිළදී ගන්න පොත් කඩවලදි ඇස ගැටුනෙත් නෑ. ආයෙත් කියවන්න හිතුනා.

    ReplyDelete
  4. Ammiyo..... Pissu Hadley.....!

    ReplyDelete
  5. Ammiyo.... Pissu hadey........!

    ReplyDelete

නූතන පටාචාරාවත

විසිතුරු බඩුව ඇය කිසිවිට නැහැ සැලුනේ.. බියකරු වනය බිය නැහැ ඇය වෙත දැනුනේ.. සිය සැමි නැතිය එන මග දරු අහිමි වුනේ.. නැති විය සිහිය ...