බුදුදහම කස්ටමයිස් කරගැන්නා ආකාරය

අද උදේත් කෝච්චිය යෑමට නියමිත වේලාවට මම දුම්රිය නැවතුමට ලඟා උනා..ඉතින් වෙනදා වගේම එදත් දුම්රිය ප්‍රමාදයි ඒක අලුත් දෙයක් නෙමෙ..අපි ඉන්නෙ සුද්ද දාල ගිය රටක..මේක සුද්ද හිටපු රටක් මිස ඉන්න එකක් නෙමෙයි ඒ නිසා අවුලක් නෑ..කෝච්චිය යන්න තියන වෙලාවට මම සපත්තු දානව එහෙමත් මාසෙක දවසක් විතර මම සපත්තු දෙක සුද්දකරන අතර දුම්රිය යනව..

අද තරමක් පාලුයි..වගේ වෙනද මගේ ඇස් යන බංකුවෙ එක්තරා තැනක් අද පාලුයි..ඒක අයිති බොහෙම කෙසඟ ඒත් පියකරු යුවතියකට..ඇය මනබඳින රූපයකින් යුක්තයි..ඒත් ඇයගේ අලංකාර රූපයටත් වඩා මගේ හිතගියේ අැෙග් ඇකයේ හිටපු කුඩා දරුවා වෙත..මේ දුම්රිය නැවතුමේ මගීන්ට ඉන්න තියෙන්නෙ කාමරයක වගේ තැනක මූනට මූන බලාගෙන එතකොට මම ඉන්න පැත්තෙ මට ඉහලින් බිත්තියේ බුදු රජානන් වහන්සේ සහ වෙනත් මහා සඟ රුවන ගමන් කරන දර්ෂණීය රූපයක් තියෙනව..ඉතින් මගේ ඉස්සරහින් අනෙක් පැත්තෙ ඇවිත් වාඩිවෙන අවුරුදු එක හමාරක දෙකක අර දඟ මල්ලක් වගේ වෙන පුංචි පුතා ඇවිත් අම්මගෙ උකුලෙන් වාඩි වුන ගමන් අර පින්තූරෙ දිහෑ ඇසිපිය නොහෙලා තත්පර ගානක් බලන් ඉන්නව..ඉන්පස්සෙ මේ පුතා තමුන්ගෙ අත්දෙක එකතුකරල අර පින්තූරෙට වඳිනව..මේක ඒ අම්මට පේනව අඩුයි ඇය ඒ වෙලාවෙ පුතා අතේ තියාගෙන එහා පැත්තෙ ඉන්න යෙහෙලියක් එක්ක කතාව..ඒ අතර අර පුංචි පුතා අර පිංතූරයට සාදු කියනව..හැබැයි ඉතින් ඒ කටයුත්ත හමාර වෙලා විනාඩි 2-3කට වඩා අම්මගෙ උකුලෙ ඉන්න අපේ ඒ පුංචි පුතාට බෑ..ඊට පස්සෙ පටන් ගන්නව දැඟලිල්ල සමහර දවසට කොහොම හරි අම්මගෙ උකුලෙ දඟලල දඟලල බිමට පනින්න හදනව..ඇවිදින්න තියෙන්නෙ පුදුම ආසාවක්...උදේ පාන්දර ස්ටේෂමේ තියෙන දූවිලි ගොඩ පුතා ගාගත්තම ඒව අර කන්තෝරු යන්න ලෑස්ති වෙලා ඉන්න අම්මගේ ඇගේ ගෑවෙන නිසා අම්ම කැමති නෑ පුංචි පුතාව බස්සන්න..

ඇයි අපි හේතු හොයන්නෙ...

අර පොඩි ලමය වගේ පුංචි කාලෙදි අපි බොහොම දෙනෙක් බොහොම යසට අර බුදු පිංතූරයට වඳින්න ඇති..සමහර විට අම්ම තාත්ත කීවෙ නැතත් අපිට ආච්චිල සීයලකියපු නිසා අපි වඳින්න ඇති..නමුත් අර කරඳඩු උස්මහත්වෙලා ටිකක් ලෝකෙ ටිකක් තේරෙන්න ගත්තම අපිට ටිකක් අර පරණ දේවල් පිලිගන්න නිකම් මොකද්ද වගේ වෙනව..දිව්යලෝකෙ අපාය විහිලුවක් වගේ පේනව..පස්සලේ හාමුදුරුවො නිකම් ඉන්න පිංබතෙක් වගේ පේනව..මේක වෙන්නෙ අපි ඉගෙනගන්න විශයයන් සහ ආගම අතර ඇති පරතරය නිසා විද්‍යාව පාඩමින් ජීවය ගැන එක්තරා විධීයකට කියන කොට අපේ ආගමේ ජීවය දකින්නෙ තව අයුරකින්...ඉතින් කාලයක් අපි මේ බුද්ධාගම පිලිගන්නෙ නැතුව වගේ ඉඳල ඉඳල පස්සෙ එකපාරට අපි ආයෙ දුකක් කරදරයක් ඇවිත් ඒක විස්තර කරගන්න බැරි උනාම ආගමට ඇතුලුවෙනව..ඒත් ඒ දුකතුනී උනාම නැවත අර කලින් තිබුන තැනට යනව..ඉතින් විද්‍යාව සහ ආගම අතර නිරන්තර අභ්‍යන්තර ගැටුමකින් ඉන්න අපි කාලයක් යනකොට විද්‍යාව බුදුදහමිනුත් බුදුදහම විද්‍යාවෙනුත් පහදන්න යනව..නව්ටන්ගෙ තුන්වන නියමය අල්ලගෙන ඒක බුදුන් අවුරුදු දාස් ගානකට කලින් කිව්ව කියල මැරෙන්න යනව..එතකොට ඒ නිව්ටන්ම කියපු ගුරුත්වාකර්ශනය වගේ එකක් අපේ බුදුදහම කියල තියෙන්නෙ කොහේද තාප ගතිකයේ සමහර මූලික දේවල් බුදුන්වහන්සේ කියල තියෙන්නෙ කොහේද කියල කල්පනා කරන්නෙ නෑ...එහෙම අහන්න ගියොත් අපි ගැන හිතන්නෙ අන්න ක්‍රිස්තායානි කාරයකේ අන්න තම්බියෙක් කියන විදියට..ඇත්තෙන්ම අපිට මේ දෙක ජොයන් හෙවත් සම්බන්ධ කරන්න යුනිවර්සල් ජොයින්ට් හෙවත් සර්වලෝක පූට්ටුවක් හොයන්න බෑ..දෙක වෙනමම දෙකක්..විද්‍යාව විසින් ද්‍රව්‍යයමය සහ අවකාශය සම්බන්ධ දේවල මූල පැහැදිලි කරනකොට බුදු දහම පැහැදිල් කරන්නෙ කෝමද මනුස්ස සිත දියුණු කරගන්නෙ කියල..බුදු දහම ලෝක ධාතුවේ වෙන වෙනස්කම් ගැන දැඩිව අවධානය යොමු කරල නෑ..දැං ඉතින් ත්‍රිපිටකයේ අගතැන්පත් මහත්වරුන් ඔබ එහෙම කියන්නේ කෝමද අර කෑල්ල බුදුහාමුදුරුවො ඒ කාලෙ බෝම යසට කියල තිබුන අර සූත්‍රයෙ මේ නපාතෙ මේන්න මෙතන කියල කියයි..නමුත් ඒක හරි නිෂ්ඵල වැඩක්...

අපි එක දෙයක් දැගනත්ත කියල ඇයි අනික් හැමදේම ඒක අස්සට දාගන්න යන්නෙ...බුදු දහමේ මූලික සිද්දෘන්ත අනුවම කෙළවර සෙවීම කියන්නෙ නිෂ්ඵල වැඩක්...බුදුන් දේෂිත කිසිම දෙයක් අපිට ප්‍රතිපදාවකින් තොරව විඳින්න අමාරුයි..රහත්භාවය කෙසේද කියල පොත් ලිව්වට අපිට පුලුවන්ද අපි අපේ හැමදෙයක් ගැනම තියෙන නොසංසිඳෙන ආශාව නතර ගරගන්න... බෑනේද??

ලෝකයේ කෙළවර කොතනද??

මේකට ලස්සන උදාහරණයක් තියෙනව ගම්පල වාදයෙදි..ඒකදි 
ක්‍රිස්තියානි පාර්ශවයෙන් නැගෙනව මෙහෙම ප්‍රශ්ණයක්..
බුදු කෙනකුන් බුදු වීමට නම් කලින් බුදු කෙනුකුගෙන් නියත විවරණ ගතයුතු යැයි බුද්ධාගම් කාරයො කියති.එසේ නම් පලමුවෙන් බුදු වූ බුදුන් විවරණ නොලබා බුදු වූයේ කෙසේද?
ඒ සඳහා මිගෙට්ටුවත්තේ ගුනානන්ද හාමුදුරුවෝ මෙන්න මෙහෙම උත්තරයක් දෙනවා.
 මුල්වූ එනම් පලමුවෙන් බුදු වූ බුදු කෙනෙකුන් ඇතැයි මේ කතිසේරු (ක්‍රිස්තියානි දේවගැති) තැන කියයි..මුන්නැහේ එහෙම කීවාට අපි එසේ කියන්නේ නැත.අනන්ත වූලෝක ධාතුවේ සක්වලවල් ඇත ඒවා කලින් කල සැදෙන අතර ඒවාෙය් වෙසෙන සත්වයාද කලින් කල ඇතිවේ නැතිවේ..එවැන්ව සලකා බැලූ කල මෙහි ඇතිවූ ආකාරයක් නැත.මෙකී ප්‍රානින් ඇතිවූ මුලයක් නැත.

මේ ලෝක ධාතුවෙන් මේ අසවල් කල මේ ලෝකය හැදුනා කියා කියනවානම් ඉන් පෙර හිස් කුහරයක් පමණක් ඇති බව හැගෙයි.එසේ කිසිත් නැති කමක සිට අනන්ත කාලයකින් මේ ලෝකය සැදුනානම් ඉන් පෙරත් මෙය වන්නට බැරිකමක් නැත.කිනම් හෝ දෙවියෙක් මේ ලෝකය මැව්වානම් එවන් දෙයක් ඉන් පෙරත් සිදුවීමට ඉඩකඩ ඇත..එසේ වීමට නොහැකි යැයි කිසිවෙකුටත් කිය නොහැකිය.මේ ලෝකය සහ සත්වයන් මවන්ට හෝ සදන්ට යම් කාලයක් ඇත්නම් එයට පෙරත් එයම සිදුවිය හැක.එනිසා මේ ලෝකයට මුල්වූ පටන් ගැන්මක් තියෙන්නට බැරිය.ඇතිව නැතිවෙන්නාවූ සවභාවයෙන් යුක්තව සදාකල් පවතින්නාවූ ලෝකයටද එහි වාසය කරන අනන්ත වූ සත්වයන්ටද ආදියක් නැත, අනන්තයක් නැත. එබඳු සත්වයන් අතරේ පහල වන්නාවූ බුදුවරුන්ද අනන්ත් වන්නේය.එබැව්න් මුල්වූ බුදු කෙනෙක් නැත.එම නිසා මේ කතිසේරු තැන මුලින් බුදු වූ බුදුන් විවරණ ලැබුවේ හෙවත් සරණ ගත්තේ කොය් බදුන් ගේනද කියා අපෙන් ඇසුවේ බුද්ධ ධර්මය හරි අකාර නොදැනම බව පෙනේ.

මා මේ කියන බසට වඩා ඉතාමත් තර්කානුකූල ලෙස මේ දෙසුම ඉදිරිපත් කරන්නට අපේ මොහොට්ටිවත්තේ ගුණානන්ද හිමි සමත්ව තිබුණි..මේ අද ඊයේ නොව මීට වසර සියයකට එහා අද තිබෙන භෞතික විදයාව ප්‍රාථමික අවස්ථාවේ ලෝකයේ ආරම්භය ගැන ඇති වූ වියත් සිංහලයකුගේ කතාවකි...මෙහි පවතින ආකාරයට අපි ඉගෙනගන්නා සරල භෞතික විද්‍යාවේ සරල රේඛාවක් ලෙස දක්වන කාල අක්ෂය ඇත්තෙන්ම එසේම විය නොහැක..සමාරවිට කාල අක්ෂය ඉරටුවක් වැනි දෙයක්වී එය අපි රවුම් ආකාරයට නැව්වානම් අත්වන තත්වය කෙබඳුද..දැන් ලෝකයේ සොයාගන්නා සහ සොයාගත් දේ බුදු දහම අනුව විග්‍රහ කරන්නට ගොස් හත්පොලේ ගාගන්නා උතුමන් ප්‍රත්‍යක්ෂයෙන්ම දැනගත යුතු කරුණ නම් එවන් දේ ගැන බුදු දහම දැඩි අවධානයක් නොකර ඇති බවය..

ත්‍රිපිටකයේ සහ කුරාණයේ බයිබලයේ ප්‍රමාණය...

ත්‍රිපිටකයේ ප්‍රමාණය කෙතෙක්ද..ත්‍රිපිටකය මෙතෙක් වේයැයි කෙනෙක්ට ප්‍රකාශ කල හැකිනම් ඒ තෙමේ බුදු වරයෙකුම විය යුතුයැ.ත්‍රිපිටක ධර්මයෙන් බොහෝ කොටසක් පෙර විසූ විචක්ෂණ හිමිවරුන් විසින් ලියා තිබේ..ඒ අතර සාමාන්‍ය මිනිසුන්ට තේරෙන්නට කවි කතා ආදී ලෙස බුදු දහම සරල ලෙසද දක්වා තිබේ..ඒ ගැඹුරු දහම අල්වාගන්නේ නැතුව යමෙක් අර ජාතක කතා පන්සිල් අටසිල් ආදී දෙයින් අල්වා ගන්නේ නම්ඒ ක්‍රියාව  මිටක් ඇති ආයුධය වෙනත් තැනකින් ඇල්වූවාහා සම වෙයි..මේ ඇති විශාලත්වය නිසාම විවිධ සංඝයා වහන්සේලා විවිධ කොටස් ගෙන තමුන්ගේ අත්දැකීම්ද එකතුකර විස්තර කරන්ට යනවිට යම් යම් පරස්පර ගැටලු ඇතිවිය හැක..නමුත් නියම බෞද්ධයා යනු බුදුන් දැක එයින් සිත් පහදවාගන්නා අයවලුන් නොව ධර්මයම දකින්නා බව බොදු පොතපතේම සඳහන් වෙයි..බුදුන්ගේ ශ්‍රාවකයින් සරණ යෑම නොව විවිධ ස්තානවල විවිධ මට්ටමේ සංඝයා වහන්සේලා දෙසු දහම් අධ්‍යනය කර තමුන්ට ගැලෙපෙන මට්ටමින් භාවනා කර සිත සංසුන් කරගැන්ම වැදගත් වෙයි..එහේත නොවන්නේත් ඒකමය..ජනප්‍රිය වන සංඝයා වහන්සේලා පසුපස ගොස් ඉන්පසු අනික් උන්නාන්සේලාට වඩා මේ උන්නාන්සේ වැදගත් යැයි අනවශ්‍ය රාගසිත් ඇතිකරගෙන කෙලෙස් තව තවත් ශරීරයට අලවාගන්නට තනනවා මිසක මේ සියල්ල ධර්මයම මූලික කොට නැසෙන සුලු බැවින් ඇලීම වැදගත් නොවන්නේ යැයි සිතන්නෝ අල්පය..

අද මාධ්‍ය සහ අපේ දහම.. .
බුදුන් වහන්සේ අයිති වූයේ ශාක්‍ය කුලේටය..ශාඛ්‍යන් සහ කෝලියයන් අතර යුද්ධ ඇතිවීමට ගිය අවස්තාවේ බුදුන් තමුන් අයිති කුලේට වැඩිපුර සලකන්ට ගියේ නැත..ගංගාවක් දෙපස කඳවුරු බැඳ සිටි දෙපාර්ශවයට පෙනෙන්නට ගඟ මැදට වැඩමකොට දහම් දේශනා කොට ඒ දෙපාර්ශවයේ වෛරය සංසිදුවීමට කටයුතු කලෝය..නමුත් අද ලංකාවේ වන්නේ සංඝයා වහන්සේ පක්ශවලට පාට වලට කුලයට පලාතට ආදී වන ලෙස බේධ වී බුදුන් නියම කල සිවුර තුල සිටියත් බුදුන් නියම කල ධර්මය තුල වැඩ නොසිටීමයි..අෑත ගම් දනව්වල මෙන්ම මේ කොළඹ හතේද බොහෝ  ස්වාමින් වහන්සේලා ඉතාම අප්‍රකටව දුක් සහිත තත්ව යටතේ සිය බණ භාවනා කරගෙන ධාර්මිකව සිය කටයුතු කරගෙන ගියත්..පලාතම ගඳ ගස්සමින් තමුන්ද ගඳ ගසාගෙන යන කුනු ටැක්ටර් වැනි මාධ්‍ය කඩ කාරයෝ කුනුම සොයති කුනු පණුවන් දමන ඕජස් වෑහෙන පරිදි සිය මාධ්‍ය වල මූලික කොටම දමති..මේ අපේ දහමය.මේ අපේ ජාතියය.මේ අපේ රටය කියා වගේ වගක් නැත..එහෙත් විටෙක ඔවුන් තරම් සේවයක් කර ඇති පිරිසක් තවත් මේ පරසක්වලවත් නොමැති යයි ඔවුන්ම ප්‍රශස්ති ද ගායනා කරගනිති..
එක්තරා කාලය ක අඳුරු යුගයක ලංකාවේ නින්දිත ලෙස මරා දමා පාරේ තිබූ දැවෙන මරණ කිහිපයක් අදද ජාතික රූපවාහිනියේ හෝ අයි ටී එන් එකේ යූ ඇන් පියට බනින්නට යොදාගන්නවා මා දැක ඇත..වැරදිලාවත් මෙය ලංකාවෙ සිටින විදේශිකයෙකු දුටුවහොත් මේ රට තවමත් මිනී කන්නන්ගේ දේශයක් ලෙස ඔවුන් දකිනු ඇත..නමුත් 2001 අමෙරිකානු වෙළඳ මධ්‍යස්ථානයට එල්ල කරන ලද ප්‍රහාරයේදී එකදු තුවාල ලත් පුද්ගලයෙක්වත් එකදු මරණයක්වත් ඒ අසල තිබෙනු කිසිදු මාධ්‍යයක තවමත් දැක නැත.දැනටද හැකිනම් එසේ දෙදාස් ගනනක් පණපිටින් වැලලුනු ලෝක වෙළඳ මධ්‍යස්ථාන ප්‍රහාරයේ දී එවෙලේම මියගිය මස් කෑලි විසිරී ගිය පින්තූරයක් සොයාගත් අයෙකු වෙත් නම් ලින්ක් එකක් දමන මෙන් කරුණාවෙන් ඉල්ලා සිටිමි.