මුංව එල්ලන් නැත්තෙ ඇයි? The Physician (2013)

මිනිස්සු ශිෂ්ඨාචාරගත වෙලා බොහොම කාලයක් යනකල් මිනිස්සුන්ට හැකියාවක් තිබුනෙ නැහැ අනුන්ගෙ මත ඉවසන්න. සොක්‍රටීස්,ගැලීලියෝ,කොපර්නිකස් වගේ අය ඒ ඒ කාල වකවානුවෙදි හදිසියේ මරණයට පත්වෙන්නෙ ආන්න ඒ හේතුව නිසා.

ලෝකෙ දැනට දියුනුයි කියල සම්මත රටවල,ඒ විදියට අනුන්ගේ මත ඉවසන්න බැරි තමුන්ට විරුද්ධ අයගේ මරණයෙන් සන්තෝස වෙන මිනිස්සු ස්ටාර් කරනවා අඩුයි. දියුනු රටවල එහෙම මිනිස්සු නැහැ නෙමෙයි. ඉන්නවා නමුත් එයාලට පොරවල් වෙන්න තිබෙන ඉඩකඩ අඩුයි. මේ ගතවෙන මොහොතෙ ලාංකිකයින්ගේ ෆේස්බුක් ඇතුලෙ විවිධ ආගම් ජාති සහ වෙනත් කෝන්තර හේතුවෙන් පෝස්ටර් බැනර් පවා හුවමාරු වෙනවා මරා දමමු කියලා. ඒක හරිම සරල දෙයක් වෙලා. මරණය සරලදෙයක්ද? අනික මරණ එක හෝ අධිකලෙස මිනිස්සුන්ට වද දෙන එක ලංකාවෙ ෆැෂන් එකක්ද? 

දේවදත්තට බුදුන් වහන්සේ එක්ක වාදකරලා දිනන්න පුලුවන් කමක් තිබුන් නැහැ. තදට කිව්වොත් මතවාදීව බුදුන් වහන්සේ පරාජය කරන්න දේවදත්තට හැකියාවක් තිබුන් නැහැ. ඒ නිසා දේවදත්ත විවිධ ක්‍රම වලින් බුදුන්ව මරන්න සැලසුම් කලා. දැන් ඇතිවෙලා තිබෙන අලුත් බෞද්ධ ප්‍රබෝධය සහ බෞද්ධයින්ට අන්‍යාගමිකයින් නොරිස්සීම මේ දේවදත්ත ගේ අදහස් එක්ක පුදුම විදියට සමපාත වෙනවා. දේවදත්තට ඕනි වුනා බුදු දහම තමුන්ට ඕනි විදියට කස්ටමයිස් කරගන්න. මේ අලුත් අයටත් හෙමයි. ත්‍රිපිටකයේ තියෙන ආත්මාරක්ෂාව සලසගන්න ක්‍රියා කලා කියලා තියෙන කොටස් පවා ඇදල අරගෙන බුදුදහම මේ දේවදත්තලාට ඕනි විදියට සකසාගන්න පුදුමාකාර උත්සාහයක් ගන්නවා. 

මේව දිහා බැලුවම මට හිතුන දෙයක් තමයි. මිනිස්සු ආගම් නිසා මේ තරං මරා ගන්නවා නම් එකිනෙකාට වෛර කරගෙන හිංසා කරගෙන දගලනවා නම් අපි ආගම අදහන එකේ තේරුමක් නැහැ. ඒ නිසා උප්පැන්න සහතිකේ තියෙන බෞද්ධ කියන කෑල්ල එහෙම තියෙන්න ඇරලා මොකුත්ම ආගමක් නැතුව ඉන්න මම තීරණය කලා. ආගමක් නැති වුනාම මගේ මිනියට මක්කා වෙයිද? මැරුනට පස්සෙ ආත්මෙ කොහෙ යයිද? අදාල නැහැ මොකද එතකොට මම මැරිල ඉවරයි. 

ලෝක ඉතිහාසෙ ගැන බැලුවොත් ආගම් බදාගෙන මිනිස්සු ඒවට වැඳගෙන කුසීතව තමුන්ගේ ඉරණම දෙයියන්ට සහ විවිධ මතිමතාන්තර වලට බාරදීල නිකා හිටියනම් ලෝකෙ මේ තරං ලස්සන තැනක් වෙන්නෙ නැහැ. තියෙන හැම වැදගත් දේම පස්සට දාල නිවන දිහා බලං බාවනා කර කර හිටියනං ලෝකය මේ තරං මිනිස්සු ගානකට ජීවත් වෙන්න පුලුවන් තැනක් වෙන්නෙ නැහැ. දේව ආගම් වුනත් ඒ වගේ. අද වුනත් ලෝකෙ දැඩි ආගම භක්තිකයින් ජීවත්වෙන පැතිවල අලුත් සොයාගැනීම් නව චින්තන දහරාවන් ඇතිවෙනවා අඩුයි. 

මිනිස්සු පෝසත් වෙන්න ඕනි ආගමික මත වලින් නෙමෙයි දැනුමෙන්. නිතර අලුත් වෙන වෙනස්වෙන ලෝකෙත් එක්ක යන දැනුමෙන්. ඒ වගේම අනවශ්‍ය ලෙස අනුන්ට හිංසාකාරී ලෙස හැසිරෙන මිනිස්සු පාලනය වෙන්න ඕනි නීතියෙන්.  ඔය දෙකම නැති තැන ආගම් ලොකු වෙනවා ජාතිය ලොකු වෙනවා. නැත්නම් ඒකෙ අනික් පැත්ත,නීතිය සහ විද්‍යාත්මක දැනුම නැති තැන ආගම් සරුවට පොලව බදාගෙන පැල වෙනවා. 

The Physician කියන්නෙ ජර්මානු සිනමාපටයක්. මේ ෆිල්ම් එකේ කතාව අහඹු සිදුවීම් ගනනාවකින් සමන්විත වෙනවා. මේක ජර්මානු නවකතාවක් ඇසුරින් නිර්මාණය කෙරුන එකක්. මේ ෆිල්ම් එකේ කතාවස්තුව වෙන්නෙ වෛද්‍ය කර්මය. වෛද්‍යවරුන් වීමට පෙරුම් පුරන මිනිසුන් සම්බන්ධව මේ සිනමා පටයේදී කතා කරනවා. එවකට පැවති මුස්ලිම් ආගමිනුත් ක්‍රිස්තියානි ආගමිනුත් මේ වෛද්‍ය විද්‍යාත්මක දැනුමට ලැබුන ආලෝකය මේ සිනමා කෘතියෙන් මොනවට විදහා පෙන්වනවා. ආගම සහ විද්‍යාව දැඩිව ගැටෙන පසුබිමක එවකට සුළුතරයක් වුන විද්‍යාත්මක මත දැරුවන් වෙනුවෙන් පෙනීසිටපු ඒ කාලෙ වෛද්‍ය විද්‍යාඥයො සැබෑ වීරයෝ වෙන්න ඇති. අද නම් ආගමික මත සහ විද්‍යාත්මක මත සැබැවින්ම ගැටෙන්නෙ රෑට කෑම දිරවන්න අපි බලන රූපවාහිනී කයිය වැඩසටහන් වලදි විතරයි. 

එක්තරා කාලයකදී විද්‍යාවෙ සොයාගැනීම් වලට ආගම් වලින් ලැබුනෙ ආලෝකයක් නෙමෙයි අඳුරක්. ඒ අඳුර තාමත් අපවටා හොල්මන් කරනවා. මෙච්චර තාක්ෂණය දියුනු කාලෙකත් ඉරිද පත්තරේ කාලි මෑනියෝ සහ වශී ඇඩ්වර්ටීස්මන්ට් කීපයක් බලාගන්න පුලුවන් වෙලා තියෙන්නෙ ඒ නිසා කියලයි මට හිතෙන්නෙ. ඒ විතරක් නම් මැදෑ ඉන්ටනෙට් එකෙන් වුනත් තොරන් සයිට් වල කාලි මෑනියෝ දෙයියෝ සහ වශී කාරයො වැහි වැහැල.

කෝම වුනත් The Physician අලංකාර කතා වස්තුවක්, ලක්ෂන නිලියෙක්, පරණ යුද්ධ කල කෝලහාල. මේ දවස්වල අපේ රටේ ජනප්‍රිය වුනු ඉංග්‍රීසි පරණ මාදිලියේ පසුබිම සහිත හොඳ කතාවක් මේකෙ තියෙනවා. මේ ෆිල්ම් එක හොලිවුඩ් එකක් නොවන නිසාත් ඒකෙත් අමුතුම රසයක් තිබෙනවා. මොනවා වුනත් මම ඉහත ලියල තියෙන මෙලෝ අල බෝලයක් නොතේරුනත් කිසි ගේමක් නැතුව මුල ඉඳන් කට ඇරං බලං ඉන්න පුලුවන් ලස්සන ෆිල්ම් එකක්. 

මේ අයි ඇම් ඩි බී ලිංක් එක :- http://www.imdb.com/title/tt2101473/?ref_=nb_watch_?ref_=nv_wl_img_1
මේ බයිස්කෝප්ප එල් කේ එකේ ලිංක් එක :- http://www.baiscopelk.com/the-physician-2013-with-sinhalasub/